په کابل پوهنتون کې د قرآن کریم د اعجاز تر سرلیک لاندې علمي کنفرانس جوړ شو
د روژې د مبارکې میاشتې او د قرآن کریم د نزول په مناسبت د کابل پوهنتون شرعیاتو پوهنځي له خوا د قرآن کریم اعجاز تر سرلیک لاندې علمي کنفرانس جوړ شو. په دې کنفرانس کې د پوهنتون رهبرۍ، لوړو زده کړو وزارت رئیسانو، د کابل والي، د پوهنتون یو شمېر استادانو او کارکوونکو ګډون کړی و.
په دغه کنفرانس کې د شرعیاتو پوهنځی رئیس محترم شیخ مولوي عبدالمعید ابوالجراد میلمنو ته ښه راغلاست ترڅنګ د قرآن کریم په معجزو او حقایقو یې خبرې وکړې او هغه یې د مسلمانانو لپاره د خیر او برکت کتاب یاد کړ. هغه د قران کریم د لفظي معجزې او د هغه دمنظموالي په اړه هم خبرې وکړې.
د کابل والي ښاغلي شیخ محمد قاسم خالد د قران کریم د علمي معجزو په اړه خبرې وکړې او د کابل پوهنتون له خوا د یادو مراسمو د برابرولو له امله مننه او قدردانی وکړ.
په دې کنفرانس کې د کابل پوهنتون استادښاغلي ډاکټر عبدالصبور فخري د قرآن کریم د بلاغي اعجاز په اړه ګډونوالو ته هر اړخیز معلومات وړاندې کړل.
همدارنګه د شرعیاتو پوهنځي استاد ښاغلي ډاکټر نصرمن الله مجاهد د قرآن کریم او روژې او د دواړو ترمنځ د مشترکاتو په اړه خبرې وکړې او په دې اړه یې خپله چمتو کړې مقاله د غونډې ګډونوالو ته وړاندې کړه.
په دې کنفرانس کې پرېکړه وشوه، چې په راتلونکې کې دې د همدې موضوع په تړاو درې ورځنی علمي سیمینار هم جوړ شي.
نوموړي مراسم د روژې په افطار، په هېواد کې د اسلامي نظام د ټينګښت او د مسلمانانو د سوکالۍ او نجات په دعا سره پای ته ورسېدل.
