د کابل پوهنتون د استادانو د مسلکي انکشاف مرکز سره په همغږۍ د پوهنتونونو او لوړو زده کړه رهبري علمي سمینار جوړ شو

د کابل پوهنتون د بدلون پلان پر بنسټ، چې پدې وروستیو کې د دې پوهنتون د رهبري له لوري جوړ شوی دی، د پوهنتونونو او لوړو زده کړو رهبري علمي سمینار (University Leadership Training) د روان کال د سلواغې میاشتې په ۲۷ نېټه د کابل پوهنتون د استادانو د مسلکي پرمختیا مرکز (PDC) له لوري او د لوړو زده کړو وزارت په همکاري د یوې اونۍ لپاره د چاپېریال ساتنې پوهنځي د کنفرانسونو په تالار کې جوړ شو.

له کابل پوهنتون د استادانو مسلکي پرمختیا مرکز سره په همغږۍ او د لوړو زده کړو وزارت په ملاتړ د پوهنتونونو او لوړو زده کړو موسسو رهبریت سمینار د کابل پوهنتون د پوهنځیو رییسانو او د څانګو امرینو لپاره جوړ شوی دی. دا سمینار، چې په پام کې ده د یوې اونۍ لپاره دوام ولري، «په مډرنه نړۍ کې د پوهنتونونو رهبریت»، «په افغانستان کې د پوهنتونونو عالي رهبري»، «د څېړنې کلتور د دودولو لپاره د غوره والي او ظرفیت جوړونه»، «د لوړو زده کړو موسسو د کیفیت تضمین او باور ورکونه»، «له سټراټیژیکو تفکراتو څخه په ګټه اخیستنه په برنامو او رهبری کې د مثبتو بدلونونو رامنځته کول»، «په لوړو زده کړو موسسو کې د کړکېچ مدیریت»، « د لوړو زده کړو موسسو مالي استقلالیت او د هغوی اقتصادي موثریت»، «د نړۍ د پوهنتونونو درجه بندي»، او ... موضوعاتو علمي او مسلکي بحثونه ترسره شول.

د دې علمي سمینار په پرانیسته کې، چې د دوشنبې په ورځ په یاد تالار کې جوړ شوی وو، د کابل پوهنتون رییس پوهاند دکتور محمد عثمان بابري، د پوهنتون د علمي چارو مرستیال، د استادانو د مسلکي پرمختیا مرکز امر، د پوهنځيو رییسانو او د مختلفو پوهنځیو ډیپارټمنټونو امرینو شتون درلود، چې د دې علمي سمینار لومړۍ ورځ د کابل پوهنتون د سیول انجینري څانګې استاد دکتور پوهنمل بشیر احمد جاوېد « په پوهنتونونو او لوړو زده کړو بنسټونو کې رهبريت» موضوع وړاندې کړه او نور بحثونه به په راتلونکې یوه اونۍ کې تر سره شي.