د وترنري علومو پوهنځي د میکروبونو له مقاومت سره د مبارزې د اغېزمنو میتودونو تر عنوان لاندې ورکشاپ دائر کړ
دغه ورکشاپ د کرنې وزارت د څارویو د روغتیا ریاست د کنفرانسونو په تالار کې ددغه ریاست، د روغتیا نړیوالې ادارې او د عامې روغتیا وزارت په مرسته د وترنر ډاکټرانو، د چرګانو، غواګانو او کبانو فارم لرونکو او د لبنیاتو د پروسس کوونکو شرکتونو لپاره دائر شو.
د ورکشاپ په پیل کې د کرنې او مالدارۍ وزارت د څارویو د روغتیا رئیس ښاغلي مفتي ذاکرالله د غونډې ګډونوالو ته ښه راغلاست وویل او هیله یې څرګنده کړه چې له دغه پروګرام څخه په ښه ډول ګټه واخیستل شي، استادان او متخصصین له یو بل سره خپلې تجربې شریکې کړي او پر مټ یې د میکروبونو د مقاوم کېدو د مخنیوي لپاره لارې چارې پیدا او د ګډونوالو سره یې شریکې کړي.
ورپسې د وترنري علومو پوهنځي رئیس ښاغلي پوهاند ډاکټر شیرشاه سادات د کابل پوهنتون په استازولۍ د ورکشاپ په موضوع باندې هر اړخیزې خبرې وکړې او یاد ورکشاپ یې ګټور وباله هغه زیاته کړه چې پوهنتونونه مسؤلیت لري چې څېړونکي او متخصصین وروزي او په عرضه کوونکو ادارو کې یې د خدمت کولو لپاره وړاندې کړي.
پدې ورکشاپ کې د روغتیا نړیوالې ادارې استازي ښاغلي ډاکټر صفي الله ندیب او د عامې روغتیا وزارت استازي ډاکټر نصیر ستانکزي هم د یادې موضوع په اړه بحث وکړ او د اړونده ادارو څخه یې د همغږۍ غوښتنه وکړه ترڅو هېواد ته د بې کیفیته درملو د واردولو څخه چې د میکروبونو د مقاومت باعث کېږي مخنیوي وشي.
دغه ورکشاپ به دوه ورځې دوام وکړي چې د وترنري علومو پوهنځي استادان او نور متخصصین به د میکروبونو له مقاومت سره د مبارزې په اړه خپل پریزینټشنونه وړاندې کړي او همدارنګه به ګډونوال خپل نظرونه او پوښتنې د موضوع په اړه مطرح کړي.
