د کابل پوهنتون په انګړ کې په ۱۲ جریبه ځمکه کې د محصلینو پارک د جوړیدو کار پیل شو
د کابل پوهنتون ادراي او مالي چارو مرستیال ښاغلي حافظ عبیدالله "عبیده" د روان کال کب میاشتې په ۲۵ نېټه پنجشنبې ورځ د کابل پوهنتون په انګړ کې د پوهنځيو رئیسانو، استادانو او محصلینو په موجودیت کې په ۱۲ جریبه ځمکه کې د محصلینو پارک د جوړیدو ډبره کېښووده.
د پوهنتو ن مالي او اداري چارو مرستیال وویل، چې نوموړی پارک جوړېدو لګښت د پوهنتون داخلي بودیجې څخه اجراء کیږي او په پام کې لري، چې په نیژدې راتلونکي کې به ګټې اخیستنې ته وسپارل شي.
نوموړي وویل: ( په دې پارک کې به چمن هم کرل کیږي او ددې پارک جوړېدو ځخه موخه د چاپېریال څخه ساتنه، د سمسور چاپېریال رامنځ ته کول او همدارنګه د محصلینو د مطالعې لپاره د مناسب چاپېریال برابرول دي.
ښاغلي حافظ عبیده زیاته کړه:( د پوهنتون په نورو برخو کې هم د ښیرازه چاپیریال د جوړولو چارې هم دوام لري او موږ هڅه کوو، چې په راتلونکي کې د کابل پوهنتون د ښېرازۍ لپاره لا زیات کارونه ترسره کړو.
د محصلینو پارک د ډیزان مسؤل انجینر جاوید الکوزی وايي، په نوموړي پارک کې به له دوه زره څخه زیاتې اصل زینتي نیالګي کینوي، چې د اوبو رسولو سیستم یې هم په منظم ډول چمتو دی او د محصلینو د تفریح او مطالعې په موخه هم ځانګړي ځایونه په نظر کې نیول شوي دي.
دکابل پوهنتون محصلینو د یاد پارک له جوړیدو ځخه خوښي څرګنده کړه او هغه یې د ښیرازه فضا او چاپېریال په ساتلو کې ګټور یاد کړ او د پوهنتون له رهبرۍ څخه یې غوښتنه وکړه، چې په دې برخه کې لا ډیرې هڅې ترسره کړي.
دا په داسې حال کې ده، چې مخکې له دې د کابل پوهنتون مالي او اداري چارو مرستیال دپوهنتون د سمسورتیا په موخه د پوهنتون د انګړ په مختلفو برخو کې له (۵۰۰) څخه زیاتې زینتي نیالګي کېنولي دي.
