د احمد وحید مژده د شهادت څلورم تلین نمانځنه ترسره شوه
په کابل پوهنتون کې د ملي راډیو تلویزیون لخوا په جوړه شوې یاد غونډه کې د هیواد پخواني دیپلومات او شنونکي شهید احمد وحید مژده د شهادت څلورم تلین نمانځنه ترسره شوه.
په یاده غونډه کې د بهرنیو چارو وزارت سرپرست ښاغلي مولوي امیرخان متقي، کابل پوهنتون رهبرۍ، لوړو زده کړو وزارت مرستیالانو، د اقتصاد وزارت مرستیال، ملي راډیو تلویزیون رئیس، د المپیک کمیتې رئیس، کابل پوهنتون استادانو او د مختلفو ادارو مسؤلینو پکې ګډون کړی وو.
په غونډه کې وینا والو په خپل نوبت د امریکایي او شوروي اتحاد یرغل په وړاندې د جهاد په دوران کې د شهید مژده په مبارزې، شخصیت او دده په ټولنیزو ځانګړنو خبرې وکړې او نوموړی یې قلمي مبارز، اسلام او ملي ګټو ته ژمن شخص یاد کړ.
د ملي راډیو تلویزیون رئیس ښاغلي احمدالله وثیق شهید مژده غښتلی شنونکی او باعلمه شخصیت یاد کړ او ټینګار یې وکړ چې، شهید مژده د امریکایي یرغل پر وړاندې غیرتي قلمي او سنګري مبارز وو.
همدارنګه ښاغلي وثیق د کابل پوهنتون رهبرۍ څخه د غونډې په برابرولو کې له همکارۍ څخه د مننې تر څنګ زیاته کړه چې، ډېر ژر به ملي راډیو تلویزیون د نوموړي علمي بنسټ سره د همکارۍ هوکړه لیک لاسلیک کړي.
د بهرنیو چارو وزارت سرپرست ښاغلي امیرخان متقي د شهید مژده د شخصیت په اړه مفصلې خبرې وکړې، نوموړی یې موفق دیپلومات او شنونکی شخصیت یاد کړ او زیاته یې کړه چې، د شهید مژده نوم به تلپاتې او د هغه له نیکو کړنو به یادونه کیږي.
په یاده غونډه کې د کابل پوهنتون رئیس ښاغلي دکتور اسامه عزیز، د لوړو زده کړو وزارت علمي مرستیال، د اقتصاد وزارت مرستیال عبدالطیف نظري، سیاسي شنونکي ښاغلي زمان مزمل او یو شمېر نورو کارپوهانو د شهید احمد وحید مژده په شخصیت خبرې وکړې او دهغه له نیکو کړنو یې ستاینه وکړه.
