فارمسي پوهنځي د فارما هیلت کمپنۍ سره هوکړه لیک لاسلیک کړ
د کابل پوهنتون فارمسي پوهنځي د روان کال غبرګولي میاشتې په ۱۵نېټه د دوشنبې په ورځ د داخلي درملو د تولید کمپنۍ فارماهیلت سره د همکارۍ هوکړه لیک لاسلیک کړ.
یاد هوکړه لیک د لاندې موخو په اساس لاسلیک شو:
۱ــ د کیفیت د کنترول او تولید په برخه کې د فابریکې د مسلکي کارکوونکو د ظرفیت لوړول.
۲ــ د ګډو څیړنیزو پروژو په لاره اچول.
۳ــ د ګډو ملي او نړیوالو سمینارونو او کنفرانسونو ترسره کول.
۴ــ د پوهنځي فارغ محصلینو ګمارنه او هغوی ته د کار زده کړې زمینې برابرول.
د کابل پوهنتون رئیس ښاغلي دکتور اسامه عزیز د یاد هوکړه لیک د لاسلیک په وخت کې د درملو د کیفیت ټیټوالی او ټولنې ته د هغه په زیان خبرې وکړې؛ او دې برخې ته یې پاملرنه د دولتي بنسټونو او داخلي شرکتونو وظیفه و بلله. نوموړي د یاد هوکړه لیک د ټولو اړخونو په عملي کیدو ټینګار وکړ.
د فارماهیلت کمپنۍ رئیس ښاغلي محمدنظیر او فارمسي پوهنځي رئیس ښاغلي پوهنوال آقامحمد ژکفر ددې هوکړه لیک د اهمیت ترڅنګ د کابل پوهنتون رهبرۍ ته د هغه له عملي کولو څخه ډاډ ورکړ.
د کابل پوهنتوون فارمسي پوهنځي د تجربه لرونکو استادانو او مجهزو لابراتوارونو په لرلو د لوړ علمي او څړنیز ظرفیت لرونکی دی؛ چې د بیلا بیلو مسلکي بنسټونو سره یې د همکارۍ هوکړه لیکونه لاسلیک کړي او تر اوسه یې ډیری په عملي توګه پلي کړي هم دي.
