د کابل پوهنتون د محصلینو اتحادیې له لوري د روژې مبارکې میاشتې په ویاړ د قران کریم ختم وشو
د قران کریم د ختم مراسم د روان کال د غوايي په ۱۹ نېټه د یکشنبې په ورځ، چې د روژې مبارکې میاشتې له ۲۷ نېټې سره برابره وه د کابل پوهنتون د محصلینو اتحادیې له لوري د کابل پوهنتون د رییس او د محصلینو چارو مرستیال، د کابل پوهنتون یو شمېر کارمندانو او محصلینو په ګډون د نشراتو امریت په تالار کې جوړ شو.
د کابل پوهنتون رییس پوهاند دکتور محمد عثمان بابري تر ختم وروسته پدې مراسمو کې خبرې وکړې او په پیل کې یې د کابل په لویدیځ کې د سیدالشهدا ښوونځي د غوايي ۱۸ نېټې پېښې د شهیدانو روح ته دعا وکړه او د محصلینو اتحادیې څخه یې د دې مراسمو د جوړېدو له امله مننه وکړه. پوهاند بابري وویل: د انسان په ژوند کې زیات فرصتونه شتون لري، چې یو د هغې ډلې څخه د روژې مبارکه میاشت ده. دا میاشت د انساني کرامت په برخه کې یو وړ فرصت او د انسان په بدن کې پټ بحشش دی همدارنګه په ځمکه د الله ج خلیفه دی، چې باید له هغه څخه ګټه پورته شي. په دې توګه روژه د ځان پېژندنې او د انسانانو جوړونه او خپله د مسلمان فرد لپاره مناسب فرصت دی تر څو وکولای شو، چې څوک یو، څشی یو او د څه لپاره پیدا شوي یو؟ او د دې لپاره ښه فرصت دی، چې ځان جوړ کړو او زمونږ د بدن مثبت او منفي مسایل کوم دي او د کومو صفاتو او نیکو اعمالو مطابق ځان جوړ کړو او دا اړینو مسایلو د خوړلو او څښلو څخه مخنیوی دی.
پوهاند بابري د خپلو خبرو په پای کې محصلینو ته په خطاب کې وویل: هیله ده، چې ګران محصلین د برنامو او د خواخوږي زیاتو غونډو د جوړېدو، د ځان، رول او چاپېریال پېژندنې، مسلمانیت، افغانیت او انسانیت تر څنګ خپل رول او برخه یې د هیواد د چارو د ښه والي او د یوه ارامه او له تبعیض، نابرابري ... څخه پاکې ټولنې په جوړېدو او د ورورولي روحیې دودولو ته دوام ورکړي او هیواد یو پرمختللي او عالي لوري ته سوق کړي.
د پوهنتون د محصلینو چارو مرستیال پوهندوی فیصل امین او د کابل پوهنتون د محصلینو اتحادیې رییس محمد مصطفی ارین هم پدې مراسمو کې خبرې وکړې او هر یو د روژې مبارکې میاشتې په فضایلو، اهمیت او د دې برنامې د جوړېدو په معنوي موخو خبرې وکړې.
