په کابل پوهنتون کې د تضمین کیفیت معیارونو په اړه د پوهاوي ورکشاپ ترسره شو
د روان کال وږي میاشتې په ۲۶نېټه د یکشنبې په ورځ په کابل پوهنتون کې د اعتبار ورکولو سند د ساتنې په موخه د تضمین کیفیت د چوکاټ په اړه د پوهاوي ورکشاپ ترسره شو، نوموړی ورکشاپ د تضمین او کیفیت آمریت او د پوهنتون د استادانو مسلکي پراختیا مرکز لخوا ترسره شو، چې ۴ ورځې به دوام وکړي.
په یاد ورکشاپ کې د کابل پوهنتون ۲۲پوهنځیو رئیسانو په ګډون له ۲۰۰څخه زیاتو د څانګو آمرینو، د پوهنځيو تضمین او کیفیت کمېټو او د اداري برخو آمرینو پکې برخه اخیستې وه.
د کابل پوهنتون رئیس ښاغلي دکتور اسامه عزیز د نوموړي ورکشاپ په اړه خبرو کې د تضمین کیفیت پروسې پیژندنه مهمه وبلله او له ګډونوالو څخه غوښتنه وکړه، چې په ورکشاپ کې په منظمه توګه برخه واخلي، ترڅو مثبته پایله ترلاسه کړي.
د لوړو زده کړو وزارت د تضمین کیفیت او اعتبار ورکولو رئیس ښاغلي شاکر وحیدي د چک لیستونو په اړه معلومات ورکړل او د تضمین کیفیت د پروسې ځینو نیمګړتیاووې یې ومنلې او ټینګار یې وکړ؛ چې هڅه کوي؛ ترڅو د کابل پوهنتون د استادانو وړاندیزونه او نظریات را ټول او یادې نیمګړتیاوې ډکې کړي.
همدارنګه د کابل پوهنتوون علمي مرستیال ښاغلي محمد اشرف غیرت د ترسره شوي ورکشاپ په اړه خبرې وکړې او دګډونوالو لپاره یې د اغېزمې ګټې ترلاسه کولو هیله څرګنده کړه.
وروسته د کابل پوهنتون تضمین کیفیت آمر ښاغلي پوهنیار زبیر خلیل الرحمن آرزمي ګډونوالو ته د نوموړي څلور ورځني ورکشاپ د چارو ترسره کولو په اړه خبرې وکړې؛ چې دهغه په اساس ګډونوال په ۳ برخو وویشل شول.
په پام کې ده، چې د روزنیزو مسایلو ترڅنګ عملي چارې هم ترسره کړي.
