د کابل ا و کندهار پوهنتونو شرعیاتو پوهنځيو ترمنځ د علمي همکارۍ هوکړه لیک لاسلیک شو
د روان کال وږي میاشتې په ۲۳مه نېټه د پنجشنبې په ورځ د کابل پوهنتون شرعیاتو پوهنځي، د کندهار پوهنتون له شرعیاتو پوهنځي سره د مرستې هوکړه لیک لاسلیک کړ.
د یاد هوکړه لیک د لاسلیک په غونډه کې د کابل پوهنتون رهبري، د شرعیاتو پوهنځي استادانو، د کندهار پوهنتون رئیس او د شرعیاتو پوهنځي استادانو برخه اخیستې وه.
نوموړی هوکړه لیک د دواړو بنسټونو ترمنځ د کندهار پوهنتون شرعیاتو پوهنځي ماسترۍ پروګرام، څېړنیزو او تدریسي مسایلو، د استادانو روزنې، سمینارونو، ورکشاپونو او کنفرانسونو په اړه ترسره شو.
د کابل پوهنتون رئیس دکتور اسامه عزیز د کندهار پوهنتون رهبرۍ ته د ښه راغلاست ترڅنګ د موضوع د اهمیت په اړه خبرې وکړې او د یاد هوکړه لیک د ټولو برخو پر عملي کولو یې ټینګار وکړ.
د کندهار پوهنتون رئیس ښاغلي مولوي احمد شاه عاصم د نوموړي هوکړه لیک له پلي کېدو ډاډ ورکړ او هغه یې په علمي مسایلو کې د کندهار پوهنتون شرعیاتو پوهنځي مهمه لاسته راوړنه یاده کړه.
د کابل پوهنتون شرعیاتو پوهنځي رئیس ښاغلي شیخ عبدالمعید ابوالجراد او همدارنګه د کندهار پوهنتون شرعیاتو پوهنځي رئیس ښاغلي مولوي حزب الله کندهاري یاد هوکړه لیک د مرستې په برخه کې د مهمو مسایلو له امله ټولنیز او بډایه یاد کړ.
د غونډې په پای کې د کابل پوهنتون فارمسي پوهنځي رئیس ښاغلي پوهنوال آقامحمد ژکفر، چې په یاده غونډه کې برخه اخیستې وه؛ د کندهار پوهنتون فارمسي پوهنځي سره د مرستې چمتووالی وښوود، په پام کې ده؛ چې په راتلونکي کې به په دې برخه کې هم هوکړه لیک لاسلیک شي.
