د کابل پوهنتون رهبري شورا ناسته جوړه شوه
د کابل پوهنتون رهبري شورا نوبتي ناسته د کابل پوهنتون رئیس ښاغلي دوکتور اسامه عزیز په مشرۍ او د ریاست مرستیالانو په ګډون جوړه شوه.
په دې ناسته کې د کابل پوهنتون رئیس د ناستې غړو ته د ښه راغلاست او د مهمو مسایلو په اړه د خبرو ترڅنګ د پسرلني سمسټر د فاینل ازموینو لپاره پر چمتووالي، په ازموینو کې د روڼتیا پیاوړتیا، د پوښتنو معیاري کولو او په ټاکلي وخت د پایلو اعلان باندې تاکید وکړ او د پوهنځیو له رئیسانو، د څانګو آمرینو او استادانو نه یې وغوښتل، چې پورته مواردو ته جدي پاملرنه وکړي.
د رهبري شورا په دې ناسته کې د ناستې غړو هر یو د خپلو پوهنځیو له لوري د ازموینو د پیل لپاره چمتووالی وښود او همدارنګه یې په اړینو موضوعاتو چې د ازموینې پر مهال باید په پام کې ونیول شي، خبرې اترې وکړې.
همدارنګه د کابل پوهنتون رئیس وویل، چې د یو لړ ستونزو په شتون کې درسونه په بریالیتوب سره پای ته ورسېدل، له استادانو او د پوهنځیو له مسؤلینو څخه یې مننه وکړه او دا یې د هغوی د تعهد او اخلاص نښه وبلله.
