د کابل پوهنتون رییس د خپرونو، علمي مجلې او د پوهنتون تر لسانس پورته برنامو امریتونو څخه لیدنه وکړه
د کابل پوهنتون رییس دکتور اسامه عزیز، د پوهنتون علمي چارو مرستیال پوهاند محمد شفیع شریفي او مالي او اداري مرستیال معلم احمد حقاني په ملتیا د کابل پوهنتون د خپرونو، علمي مجلو او تر لسانس پورته برنامو امریت څخه لیدنه وکړه.
پدې لیدنه کې دکتور اسامه عزیز د دې امریتونو د امرینو او کارکوونکو له کار او هڅو څخه مننه او ستاینه وکړه او هغوی یې مراجعینو او محصلینو لپاره اسانتیاوې برابرولو او همدارنګه د پوهنتون اداري، مسلکي او علمي کارونو د پرمختګ لپاره یې وهڅول او زیاته یې کړه، د پوهنتون رهبري د پوهنتون د کارونو د ښه تر سره کېدو او د کاري ستونزو د حل په برخه کې د هغوی د غوښتنو ملاتړ کوي او تل د هغوی په خدمت کې دی.
وروسته د یادو امریتونو، امرینو او کارکوونکو د کابل پوهنتون رییس څخه د دې څانګو د لیدنې له امله مننه وکړه او زیاته یې کړه، چې دوی د پوهنتون د پرمختګ او هوساینې لپاره په اخلاص او ريښتینولي سره هلې ځلې کوي او په راتلونکې کې به هم خپلو کارونو ته دوام ورکړي. دوی د پوهنتون له رییس سره د څانګو ستونزې او نیمګړتیاوې هم شریکې کړې او د حل لپاره یې د پاملرنې غوښتنه وکړه.
