د لوړو زده کړو وزیر د کابل پوهنتون د نجونو او هلکانو لیلیې څخه لیدنه وکړه
د روان کال د وري په ۱۲ نېټه د پنجشنبې په ورځ د لوړو زده کړو وزیر دکتور عباس بصیر په داسې حال کې، چې د لوړو زده کړو وزارت مالي او اداري مرستیال نور احمد درویش، د کابل پوهنتون رییس پوهاند دکتور محمد عثمان بابري او د دې پوهنتون مرستیالانو یې ملتیا کوله د کابل پوهنتون د هلکانو او نجونو لیلیې څخه لیدنه وکړه.
دکتور بصیر د دې لیدنې موخه له محصلینو سره خبرې اترې یادې کړې او یادونه وکړه، چې د لوړو زده کړو وزارت مسوولینو دنده ده تر څو د محصلینو لپاره خدمتونه وړاندې او د هغوی ستونزې هوارې کړي. همدارنګه د لوړو زده کړو وزیر زیاته کړه، چې دا اداره هڅه کوي تر څو د هیواد د لوړو زده کړو بنسټونو کې د محوري زده کړې سیسټم په څېړنیز محوري سیسټم بدل کړي. نوموړي تاکید وکړ، چې کابل پوهنتون به د هیواد د نورو پوهنتونونو څخه به وړاندې وي. د لوړو زده کړو وزیر په وینا د دې وزارت رهبري مصممه ده، چې په نژدې راتلونکې کې به کابل پوهنتون له علمي او اکاډمیک، مالي او اداري اړخه په ټولو برخو کې مستقل شي، چې پدې برخه کې ځینې کارونه هم تر سره شوي دي.
د کابل پوهنتون رییس پوهاند دکتور محمد عثمان بابري په لیلیو کې له ساکنو محصلینو سره په لیدنه کې په یاده لیله کې د محصلینو د ملي یووالي روحیې څخه ستاینه وکړه ویې ویل، چې پدې دواړو لیلیو کې یې د محصلینو ستونزې په پوره جدیت سره څارلي دي او د دې برخې زیاتې ستونزې حل شوي دي او پاتې ستونزې به هم حل شي. پوهاند بابري تاکید وکړ، چې نوموړی په ټول توان سره د محصلینو په خدمت کې دی او له دې امر څخه یې یوه لحظه هم غفلت ندی کړی او په دوامداره توګه د کابل پوهنتون لیلیو له وضعیت څخه څارنه کوي.
پدې لیدنه کې محصلینو هم خپلې ستونزې له دوی سره شریکې کړې او د هغوی د حل غوښتونکي شول. د هغوی د خبرو په ځواب کې د لوړو زده کړو وزیر او د کابل پوهنتون رییس وعده وکړه، چې د محصلینو له لوري یادې شوې ستونزې ژر و څېړي او د هغوی د له منځه وړلو لپاره به اقدام وکړي.
دا په داسې حال کې ده، چې د کابل پوهنتون په لیلیو کې ۳۱۰۰ محصلین شتون لري.
