د کابل پوهنتون رییس په کابل کې د چین استوګن سفیر سره د ویډیو کنفرانس له لارې خبرې وکړې
د کابل پوهنتون رییس پوهاند دکتور محمد عثمان بابري د روان کال د چنګاښ په ۶ نېټه د یکشنبې په ورځ د پوهنتون د مرستیالانو، د پوهنځیو رییسانو او د MCC19 چینايي شرکت مسوولینو، چې د کابل پوهنتون لپاره یې نوې ودانۍ جوړه کړې، په کابل کې د چین جمهوریت سفیر سره د ویډیو کنفرانس له لارې خبرې وکړې او په هیواد کې د چین همکاریو او مرستو په ځانګړې توګه د کابل پوهنتون لپاره د ۴۰ تدریسي خونو او ۱۵۰۰ کسیز ايډيټوریم جوړېدو په هکله مننه او درناوی وکړ.
د کابل پوهنتون رییس د چین هیواد د افغانستان ښه دوست یاد کړ او هیله یې وښوده، چې د لوړو زده کړو په برخه په ځانګړې توګه له کابل پوهنتون لپاره د دې هیواد مرستې دوام ولري. پوهاند بابري د دې پوهنتون لپاره د چین هیواد له لوري نوې ودانۍ جوړه شوې ده د کیفیت او تجهیزاتو له اړخه یوه نمونه یاده او زیاته یې کړه، چې په کابل پوهنتون کې د درسي کیفیت او کمیت د ښه والي په برخه کې به ګټوره او اغېزمنه وي.
وروسته په کابل کې د چین جمهوریت استوګن سفیر وانګ یو د کابل پوهنتون له رییس څخه د مننې تر څنګ یې د افغانستان په څانګړې توګه د لوړو زده کړو او کابل پوهنتون سره د دې هیواد مرستو په دوام تاکید وکړ. ښاغلي یو وویل، چې افغانستان او چین د دوستانه اړیکو لرونکي دي او چین په تېرو شلو کلونو کې د افغانستان لپاره زیاتې مرستې کړي او تر دې وروسته به هم خپلو مرستو ته دوام ورکړي. د چین سفیر په کابل پوهنتون کې د دې هیواد له لوري جوړه شوې ودانۍ یوه عصري ودانۍ وبلله او زیاته یې کړه، چې دا ودانۍ کولای شي په کابل پوهنتون زیاتې نیمګړتیاوې له منځه یوسي.
د دې ویډیو کنفرانس په پای کې د کابل پوهنتون رییس MCC19 چینايي کمپنۍ له مسوولینو او کارګرانو له کړنو او زحمتونو څخه د ستاینلیک په ورکړه سره درناوۍ وکړ او زیاته کړه، چې د دې ودانۍ په جوړېدو کې د دوی کار او هڅې نه هېرېدونکي دي.
دا ودانۍ د چین هیواد له لوري په کابل پوهنتون کې جوړه، د ۴۰ تدریسي خونو او ۱۵۰۰ کسانو د ظرفیت تالار لري، چې د MCC19 چینايي شرکت له لوري جوړه شوې ده. دا ودانۍ د کابل پوهنتون په لویديځه برخه کې په ۱۸۹۰۰ متره مربع سیمه کې په څلورو پوړونو کې د لوړو انجنیري معیارونو په پام کې نیولو سره جوړه شوې او د غونډو تالار د ګرمېدو، روغتیا او تخنیکي سیسټمونو درلودونکې ده. د دې پروژې کار په ۱۳۹۶ د تلې په ۱۸ نېټه د چین خلق جمهوریت په مالي مرسته په اته دېرش میلیونه او څلور سوه او شپېته زره امریکايي ډالرو په لګښت د چینايي شرکت MCC19 له لوري پیل شوی وو، چې په نژدې راتلونکې کې به ګټې اخیستنې ته وسپارل شي.
