په کابل پوهنتون کې د بشرپالنې نړيوال قانون په اړه درې ورځینۍ ورکشاپ جوړ شو
د بشرپالنې نړيوال قانون په اړه دری ورځینۍ ورکشاپ په کابل پوهنتون کې د جینوا کال مؤسسې له لوري د بشرپالنې نړيوال قانون په اړه د دولتي پوهنتونونو د استادانو د ظرفیت او وړتیا لوړولو په موخه جوړشو.
د دې برنامې په پرانیسته کې د کابل پوهنتون رئیس ښاغلي دکتور اسامه عزیز، د پوهنتون مرستیالانو، دلوړو زده کړو وزارت استازو، د جینوا کال مؤسسې مسؤلینو او استادانو ګډون درلود.
ښاغلي دکتور اسامه عزیز په دې برنامه کې خبرې وکړې او د جینوا کال مؤسسې له مسؤلینو څخه یې د دې برنامې د جوړېدو په هکله مننه وکړه او دا یې د بشرپالنې نړيوال قانون په اړه د استادانو د ظرفیت او وړتیاوو د لوړاوي په برخه کې ګټور یاد کړ.
همداراز دکتور عزیز ټینګار وکړ، چې په دې ورکشاپ کې به د بهرنیو ځواکونو پر وړاندې د افغانانو د ۲۰ کلن جهاد پر مهال د بشرپالنې نړيوال قانون د پلي کولو د څرنګوالي او د دغو ځواکونو له لوري د بشرپالنې قوانینو نقض په اړه د مسلکي بحثونو ترڅنګ په دې مسله د جزايي تدابیرو په اړه څېړنه وشي.
د کابل پوهنتون رئیس په وروستیو ۲۰ کالو کې حاکم وضعیت ته په اشارې وویل، چې د افغانستان د خلکو وسله وال جهاد په داسې ډول دوام درلود، چې د دې مبارزې طبعیت یې غوښټنه کوله.
نوموړي تاکید وکړ، چې فدايي عملیات او یا د خلکو او مجاهدینو ترمنځ اختلاط دا ټولې هغه طریقې وي، چې په تېر ۲۰ کلن جهاد کې ورڅخه ګټه پورته کېده.
دکتور اسامه عزیز د دې ورکشاپ له ګډونوالو څخه وپوښتل، که دوی فکر کوي، چې د اشغالګرو پروړاندې له یادو طریقو نه کار اخیستل د بشرپالنې نړیوال قانون په معیار برابر نه وو، نو د هغه حاکم وضعیت ته په کتو باید له کومې لارې څخه ګټه پورته شوې وه؟ له بل لوري په دې سمینار کې د لوړو زده کړو وزارت د بهرنیو اړیکو او بورسیو تنظیم رئیس نظر محمدعرفان هم خبرې وکړې او ویې ویل، چې په اسلام کې د بشرپالنې نړيوالو قوانینو په رعایتولو زیات ټینګارشوی دی.
همدارنګه په افغانستان کې د جینوا کال د دفتر مشرې فریانه فدايي او د جینوا کال د قانون د څانګې مشرې او د جینوا کال د اکاډمي پروفیسورې ډاکټر سندرا کراهینمن ددې پروګرام موخه د بشرپالنې نړیوالو قوانینو په ا ړه په جګړه کې د ښکېلو هیوادونو او د ملکي وګړو څخه د ساتنې پیاوړتیا په هکله د پوهاوي لوړول بیان کړل او تاکید یې وکړ، چې دا اداره یوه بې طرفه اداره ده او په ۱۶ هیوادونو کې فعاليت کوي.
د یادونې وړ ده، چې دغه سمینار به درې ورځې دوام ولري او په دې کې د کابل، ننګرهار، غزني اوالبیروني پوهنتونونو د حقوقو او شرعیاتو پوهنځيو استادان ګډون لري.
