د انساني قاچاق د مخنيوي فرمان اړوند مسابقه ترسره شوه

د کابل پوهنتون د محصلانو د انسجام او دعوت او ارشاد آمريتونو په همغږۍ او نوښت، د انساني قاچاق د مخنیوي په اړه د عاليقدرامیرالمؤمنین حفظه‌الله تعالی ۱۳ ګڼه فرمان په موضوع د محصلينو ترمنځ د عامه پوهاوي په موخه علمي مسابقه ترسره شوه.

په دې مسابقه کې د پوهنتون له بېلابېلو پوهنځیو لسګونو محصلینو ګډون کړی و. په دې مراسمو کې د درنو استادانو لخوا د فرمان پر محتوی، اهمیت او اړتيا بحث وشو، او د همدې فرمان د محتوی په رڼا کې چمتو شوي سوالونه تشریح او ګډونوالو ته وړاندې شول.

انساني قاچاق يو غير شرعي عمل دی، په افغانستان کې له څو لسيزو ياده ستونزه وجود لري او له همدې امله د انسانانو ژوند په خطر کې غورځي، د دې لپاره چې د دغه مشکل مخنیوی وشي او د خلکو ژوند، کرامت او عفت خوندي شي؛ د ا.ا.ا د مشرتابه لخوا يې په اړه فرمان صادر شوی. د همدې فرمان له مخې د څو نورو وزارتونو ترڅنګ د لوړو زده کړو وزارت ته دنده ورکړل شوې چې د انساني قاچاق او ژوند په خطر کې اچولو، د بدو عواقبو او شرعي ممانعت په اړه، د عامه پوهاوي تدبيرونه جوړ او عملي کړي او د انساني قاچاق په ناوړه عواقبو دې خلک پوه کړي.

 په همدې اساس په کابل پوهنتون کې په دې اړه ګڼ فعاليتونه ترسره کيدونکي دي چې ياده مسابقه يې يوه برخه وه.