د نشراتي کارکوونکو د ظرفیت لوړونې ورکشاپ پیل شو
د نشراتي چارو کارکوونکو د مسلکي ظرفیتونو لوړولو، د رسنیزو فعالیتونو معیاري کولو او د علمي او اکاډمیکو فعالیتونو اغېزناک انعکاس په موخه د کابل پوهنتون د نشراتو او عامه اړیکو امریت له لوري درې ورځنی روزنيز ورکشاپ پيل شو.
په دې روزنيز ورکشاپ کې د کابل او ولاياتو د پوهنتونونو او جامعاتو د نشراتي چارو کارمندان او د ژورنالیزم پوهنځي محصلان ګډون لري.
د ورکشاپ ګډونوالو ته د معیاري خبرلیکنې، تولیدي راپورونو، پښتو او دري ادبیاتو، معیاري ژباړې، مسلکي انځور اخيستنې، ګرافیک ډیزاین او د رسنیزو چارو د نورو موضوعاتو اړوند په نظري او عملي ډول د کابل پوهنتون د ژورناليزم، ادبیاتو او هنرونو پوهنځيو د استادانو له لوري روزنه ورکول کيږي.
د ورکشاپ تنظیموونکي وایي، هڅه کېږي چې د ورته برنامو له لارې د پوهنتونونو او جامعاتو نشراتي چارې لا منظمې، مسلکي او اغېزناکې شي.
د ورکشاپ پرانیستې مراسمو کې د لوړو زده کړو وزارت مالي او اداري معین، د نشراتو او عامه اړیکو رئیس، د کابل پوهنتون مرستیالانو، د پوهنځیو رئیسانو، استادانو او محصلينو هم ګډون درلود.
