په کابل پوهنتون کې «د کمال خان بند د پرانیستې په تړاو د افغانستان د اوبو سرچینو مطالعه او مدیریت» درېم علمي کنفرانس جوړ شو

د کمال خان بند د پرانیستې په ویاړ د کابل پوهنتون د کنفرانسونو په لړ کې د افغانستان د اوبو سرچینو مطالعه او مدیریت درېم کنفرانس، چې کابل پوهنتون د محصلینو چارو معاونیت له لوري د دې پوهنتون د رییس او رهبري هیئت، استادانو، محصلینو او رسنیو استازو په ګډون جوړ شوی وو.

د کابل پوهنتون رییس پوهاند دکتور محمد عثمان بابري د دې کنفرانس په پرانیسته کې، چې د روان کال د وري په ۱۱ نېټه د کابل پوهنتون د علمي شورا د ناستو په تالار کې جوړ شوې وو، په پیل کې یې د دې کنفرانس له جوړوونکو او ګډونکوونکو په ګډون خوښي وښوده او د اوبو په اهمیت، طبیعي سرچینو او د هیواد د اوبو سرچینو مدیریت باندې یې خبرې وکړې. پوهاند بابري د کابل پوهنتون له استادانو څخه مننه وکړه، چې په مختلفو برخو کې یې د کمال خان بند له جوړېدو او پرانیستې څخه په غوره توګه ملاتړ کړی او د هغه اهمیت ارزونې او په هغه پورې اړوندو مثبتو اړخونو کې اغېزمن رول لوبولی او برخه اخیستې.

د کابل پوهنتون د حقوقو او سیاسي علومو پوهنځي استاد پوهندوی نجیب اقا فهیم «معاهده آب هلمند از امضا تا اجرا»، د انجنیري پوهنځي استاد پوهنوال عبدالقیوم کریم «بررسی چالش‌های مدیریت آب‌های افغانستان و ارتباط آن با ایجاد بند کمال‌خان»، د چاپېریال ساتنې پوهنځي رییس پوهندوی محمد داوود شېرزاد «د چاپیریال له نظره د کمال‌خان بند ارزښت» د فلسفې او ټولنپېژندنې څانګې محصل ښاغلي روزبه اماني «تاثیر ایجاد بند کمال خان بر رشد و توسعه فرهنگی» او د کابل پوهنتون د اقتصاد څانګې محصل ښاغلي شریف الله کریمي «د اوبو دیپلوماسي او اقتصادي اغیز» د دې غونډې نور ویناوال وو، چې هر یو په خپل وار سره د اوبو سرچینو په ځانګړې توګه د کمال خان بند اړوند ټاکلو موضوعاتو ګټورې خبرې او بحث وکړ.

په نیمروز ولایت کې د کمال خان بند د پرانیستې په ویاړ دا درېم علمي کنفرانس دی، چې د کابل پوهنتون رهبري او استادانو له لوري جوړیږي، چې له دې څخه په ګټې اخیستنې د اوبو سرچینو پورې اړوند مهمو مسایلو په څانګړې توګه د کمال خان بند اقتصادي، ټولنییز او سیاسي اهمیت او د هغه سیاسي او حقوقي اړخونه تر څېړنې او ارزونې لاندې ونیول او ګټور او ارزښتناکه معلومات وړاندې شول.