کابل پوهنتون د بیلابیلو پوهنځیو څلورویشتو تنو استادانو د "SPSS سافټویر په کارولو سره د شمېرو پیژندنه او شننه" ورکشاپ کې ګډون وکړ

کابل پوهنتون د بېلابېلو پوهنځیو څلورویشتو استادانو « د SPSS سافټویر څخه په ګټه اخیستنه د شمېرو پېژندنه او شننه» ورکشاپ، چې د کابل پوهنتون د مسلکي پرمختیا مرکز له لوري جوړ شوی وو د روان کال د غوايي میاشتې په ۲ نېټه ګډون او د کابل پوهنتون د رییس او علمي مرستیال په ګډون باور لیکونهتر لاسه کړل.

د کابل پوهنتون رییس پوهاند دکتور محمد عثمان بابري د دې ورکشاپ ګډون کوونکو ته د باورلیکونو د ورکړې پرمهال، د کابل پوهنتون مسلکي پرمختیا مرکز له مسوولینو څخه د مننې ترڅنګ یې وویل، چې په کابل پوهنتون کې د داسې برنامو جوړول یو نیک او عالي کار او مثبت قدم دی او په کابل پوهنتون کې به د علمي او اکاډمیک بدلون سبب شي. پوهاند بابري هیله وښوده، چې د کابل پوهنتون د مسلکي پرمختیا مرکز په یو جدي څېړنیز مرکز بدل شي او د هیواد تحصیلي نظام کیفیت د ښه والي لپاره بنسټیز کارونه ترسره کړي. د کابل پوهنتون رییس وویل، چې د دې مرکز زده کړه ییز نصاب باید جوړ شي او په کومو برخو کې، چې زیاته اړتیا احساسیږي د نصاب مطابق، برنامې او علمي او څېړنیزو ورکشاپونو جوړ شي او دا به په پوهنتون کې د درسي او تحصیلي کیفیت د غوړېدا سبب شي.

په ورته مهال د وترنري پوهنځي استاد او د کابل پوهنتون د مسلکي پرمختیا مرکز آمر پوهنوال فرید احمد طنین وایې، چې په مختلفو برخو کې د دې ډول برنامو او ورکشاپونو جوړول به د دې مرکز له لوري دوام ومومي. د ښاغلي طنین په وینا پوهاوی او معیاري څېړنې ته لاسرسی، په نړۍ والو ژورنالونو کې د علمي مقالو خپرول د هیواد په تحصیلي نظام کې له یوې جدي ننګونې څخه ده او پدې برخه کې د زده کړه ییزو ورکشاپونو جوړول به ګټور وي. « د SPSS سافټویر څخه په ګټه اخیستنه د شمېرو پېژندنه او شننه» د کابل پوهنتون د مختلفو پوهنځیو څلور ویشتو استادانو لپاره د درې ورځو په موخه د څېړنې میتود، په نړۍ والو ژورنالونو کې د مقالو خپرېدل د تدریس میتود د ښه والي په موخه جوړ شوی وو.