د لوړو زده کړو وزارت د پخواني سرپرست وزیر د خدمتونو د ستاینې او درناوي په پار د خدای پاماني غونډه جوړه شوه
د لوړو زده کړو وزارت د پخواني سرپرست وزیر الحاج شیخ مولوي عبدالباقي حقاني د ښو او ارزښتناکه خدمتونو د ستاینې او درناوي په موخه د خدای پاماني په پار د یاد وزارت په تالار کې غونډه جوړه شوه.
پدغه غونډه کې د کابل پوهنتون رئیس، مرستیالانو، د لوړو زده کړو وزارت رئیسانو، کارکوونکو، د دولتي او خصوصي پوهنتونونو مسئولینو ګډون درلود.
په یاده غونډه کې ویناوالو د لوړو زده کړو وزارت د پخواني سرپرست وزیر له کړنو، لاسته راوړنو، له مسئولینو سره د ښه چلند او د هېواد د لوړو زده کړو وزارت د نظام په خدمت کې د هغه له اخلاص څخه ستاینه وکړه.
همدارنګه پدې غونډه کې د لوړو زده کړو وزارت پخواني سرپرست وزیر الحاج شیخ مولوي عبدالباقي حقاني تغیر او تبدیل په نظام کې یو اصل وباله او ټینګار یې وکړ چې د وزارت له نوي مشرتابه سره هر اړخیزه همکارۍ ته چمتو دی او هڅه به وکړي چې د پوهنې په برخه کې د هېواد ځوان نسل ته لا خدمت وکړي. هغه زیاته کړه چې افغانستان به هغه وخت ثباته او پیاوړی شي چې متخصص او با تعلیم نسل ولري او دا زمونږ دنده ده چې پدې برخه کې تر بل هر وخت زیاتې هڅې وکړو.
د غونډې په پای کې د دولتي او خصوصي پوهنتونو د رئيسانو او مسئولینو لخوا ښاغلي شیخ مولوي عبدالباقي حقاني ته تقدیر نامې او ستاینلیکونه ورکړل شول.
