د فارمسي پوهنځي محصلینو د څیړنیزو پوسټرونو وړاندې کولو دوهمه علمي سیالي ترسره شوه
په نوموړې سیالۍ کې د کابل پوهنتون رئیس، مرستیالانو، د فارمسي پوهنځي رئیس، استادانو او محصلینو پکې برخه اخیستې وه.
لومړی د قرآن کریم مبارکو آیتونو له تلاوت وروسته د پوهنځي رئیس ښاغلي پوهنوال آقامحمد ژکفر د پوهنځي وروستي کال محصلینو څیړنیزو پوسټرونو وړاندې کولو سیالۍ ترسره کېدو په اړه خبرې وکړې او یادونه یې وکړه، هغه محصلین چې څیړنیز پوسټرونه چې په اعلی توګه ارزول کیږي، له تصدیق پاڼو ورکولو ورسته د فارمسي او طب ورستیو څیړنو دوهم کنفرانس چې په پام کې ده،راتلونکي کال ترسره شي، د څیړنیز مقالې وړاندې کولو لپاره به هم نوماند شي.
د کابل پوهنتون علمي چارو مرستیال ښاغلي محمد اشرف غیرت د پوهنځي نوموړي اقدام د ستاینې ترڅنګ ددې ډول برنامو د ترسره کېدو په کابل پوهنتون د څیړنې فرهنګ رواجولو او بنسټیز کولو لپاره ګټور یاد کړ او دهغه په دوام یې ټینګار وکړ.
په دې برنامه کې د محصلینو (۷) څیړنیزې پروژې د پوسټر په شکل پریزنتیشن وړاندې کړل چې د ګډونوالو د پام وړ و ګرځېدل.
د یادونې وړ ده، چې ددې پوهنځي محصلینو څیړنیزو پوسټرونو وړاندې کولو لومړۍ علمي سیالي تیر کال ترسره شوې وه.
