په کابل پوهنتون کې د پکتیکا او خوست ولایتونو د زلزلې قربانیانو لپاره د قرآن عظیم الشان ختم وشو
په پکتیکا او خوست ولایتونو کې د زلزلې او د هیواد په نورو برخو کې د وروستیو طبیعي پېښو د قربانیانو د درناوي په موخه د کابل پوهنتون د ژورنالیزم او اړیکو پوهنځي کې د قران عظیم الشان ختم او د دعا مراسم تر سره شول. پدې مراسمو کې د پوهنتون د علمي چارو مرستیال ښاغلي پوهاند محمد شفیع شریفي اود مالي او اداري چارو مرستیال ښاغلي معلم احمد حقاني، د ژورنالیزم پوهنځي رییس، استادانو، محصلینو او کارمندانو ګډون درلود.
د دې مراسمو ګډون کوونکو د پکتیکا او خوست ولایتونو زلزلې شهیدانو او د هیواد د وروستیو طبیعي پېښو قربانیانو پاک روح ته دعا او له کورنیو سره یې غمشریکي وکړه او د دې پېښو شهیدانو لپاره یې د الله ج له درباره د جنت او د ټپیانو لپاره یې د عاجلې روغتیا او کورنیو لپاره یې د جمیل صبر غوښتنه وکړه.
ګډونوالو دغه راز پر دولت، کورنیو سوداګرو او پانګوالو، نړۍ والو خیریه بنسټونو غږ وکړ، چې د پکتیکا، خوست د زلزلې او د هیواد د وروستیو طبیعي پېښو له زیانمنو سره مرستې وکړي او هغه یې د ټولو اسلامي او بشري مسوولیت یاد کړ.
د حکومتي چارواکو په وینا، په پکتیکا او خوست ولایتونو کې د زلزلې په پایله کې نږدې ۱۵۰۰ کسان شهیدان شوي، سلګونه کورونه وران او ویجاړ او همدارنګه په سلګونه څاروي هم له منځه تللي دي او د دې سیمې اوسيدونکي جدي مرستو او لاسنیوي ته اړتیا لري.
