په کابل پوهنتون کې د کرونا واکسین دویم ډوز د پلي کېدو بهیر پیل شو
د کرونا ویروس (کوويډ-19) واکسین دویم ډوز پلي کېدو بهیر د روان کال د غبرګولي په ۱۳ نېټه د پنجشنبې په ورځ د کابل پوهنتون استادانو، کارمندانو، امنیتي ځواکونو او خدماتي کارکوونکو ته د روغیتا وزارت د کارکوونکو له لوري پیل شو.
د کرونا واکسین دویم ډوز د کابل پوهنتون د ۵۰۰ استادانو او کارمندانو ته تطبیق شو او پدې دوره کې زیات هغه کسان واکسین شول، چې عمر یې تر پنځوسو کلونو لوړ وو او په پام کې ده، چې په نژدې راتلونکې کې تر پنځوسو کلونو د کم عمر کسان هم واکسین شي.
کابل پوهنتون تقریبآ د زرو استادانو، شپږ ویشت زرو محصلینو او اوه سوه کارمندانو او خدماتي کارکوونکي لري. په کابل پوهنتون کې د کرونا واکسین لومړی ډوز تقریبآ یوه میاشت مخکې پلی شوی وو او په هغه کې د کابل پوهنتون استادان، کارمندان او محصلین واکسین شول.
د روغتیا وزارت د چارواکو په وینا د کرونا ویروس درېمه څپه د پراختیا په حال کې ده او خلک باید روغتیايي لارښوونې په پام کې ونیسي او همدارنګه واکسین تر لاسه کړي. دا په داسې حال کې ده، چې د کرونا واکسین درېمې څپې د پراختیا او د روغتیا وزارت د غوښتنو پر بنسټ د پلازمینې-کابل په ګډون د هیواد په شپاړس ولایتونو کې ټول دولتي او خصوصي تحصیلي بنسټونه د دوه اونیو لپاره رخصت شوي دي.
