علمي شورا

علمي شورا د کابل پوهنتون تر ټولو لوړه اکاډمیکه مرجع ده، چې د ډيپارټمنټونو او پوهنځیو د شوراګانو، د تقرر او انفکاک، علمي ترفېعاتو د کمېټو پرېکړو، د تګلارو د طرح، د څېړنیزو لارښودونو او نورو ټولو علمي چارو په اړه د بحث او تصمیم نیونې صلاحیت لري.

د علمي شورا جلسه د کابل پوهنتون د رییس په مشرۍ جوړېږي چې علمي مرستیال پکې د شورا د مرستیال، د استادانو امر پکې د منشي او مالي و اداري چارو او محصلینو چارو مرستیالان، د پوهنځیو رییسان او د هر پوهنځي یو یو لوړ رتبه استازي[لږ تر لږه د پوهنوال علمی رتبې په درلودا سره] او د کابل پوهنتون کادري امران پکې د غړیو په حیث ګډون کوي.

د کابل پوهنتون علمي شورا دا دندې او واکونه لري: په پوهنتون د څېړنو او تګلارو طرح او د لوړو زده کړو وزارت ته یې وړاندیز، د دوره یی بیا کتنې د کمېټې د علمي پروګرامونو بیا کتنه، رد، په اړه یې وړاندیز او یا یې تصویب، د څېړنیزو پلانونو ارزونه او په پوهنتون کې یې د تطبیق لپاره د لارښودونو وړاندیز او د شرایطو په پامنیوي د لوړو زده کړو په تقنیني اسنادو کې د طرح یا تعدیل وړاندیز.

پر دې سربېره د کابل پوهنتون اړوندو علمي پروګرامونو، ډيپارټمنټونو او پوهنځیو د تاسیس، پراختیا، مدغمېدا یا منحلېدا ، تر لیسانس پورته علمي پروګرامونو او د ظرفیت لوړونې د لنډمهالو تخصصي کورسونو د جوړېدا، د علمي کادر د غړيو د تقرر، انفکاک و تقاعد، د تحصیل د کچې او د لوړو زده کړو وزرات د اصولو په پامنیوي د علمي کادر د غړیو د علمي رتبو د تثبیت او د علمي کادر د غړیو د علمي سویې د لوړونې اړوند وړاندیزونو ارزونه او نورې دندې او واکونه چې د لوړو زده کړو د تقنیني اسنادو له مخې ورکول کېږي؛ هم د علمي شورا په صلاحیتونو کې راځي.

د کابل پوهنتون دعلمي شورا پرېکړې په رسمي ډول(له نېټې او پروټوکول شمېرې سره) د پرېکړو په کتاب کې درج او ژر تر ژره اړوندو مرجعو ته استول کېږي.