د فوق لیسانس برنامو آمریت خپلې لاسته راوړنې په جوړې شوې غونډه کې شریکې کړې
د کابل پوهنتون فوق لیسانس برنامو آمریت خپلې لاسته راوړنې او راتلونکي پلانونه د یوې غونډې په ترڅ کې ګډونوالو سره شریک کړل.
په دې اړوند جوړې شوې غونډه کې د لوړو زده کړو وزارت د فوق لیسانس کمېسیون استازو، د کابل پوهنتون رهبري، د کابل پوهنتون او د مرکزي پوهنتونونو استادانو او د یاد آمریت مسوولینو برخه واخیسته.
د فوق لیسانس برنامو آمر دوکتور محمد علي رضایي په کابل پوهنتون کې د نویو ۱۷ تازه ایجاد شویو دوکتورا او ماستري برنامو ته په اشارې سره وویل، چې کابل پوهنتون دا ظرفیت لري ترڅو د نورو برنامو سربېره دا تازه ایجاد شوې برنامې لا معیاري او بیاکیفیته کړي، هغه همداراز په بېلابېلو برخو کې خپلې وروستۍ لاسته راوړنې هم شریکې کړې. ترڅنګ یې د استادانو پوښتنو ته هم په وار سره ځوابونه ورکړل.
ورپسې د لوړو زده کړو وزارت مالي او حسابي رئیس عبدالباري خپلواک او د یاد وزارت د علمي برنامو د پراختیا رئیس په خپلو خبرو کې وویل چې، لوړو زده کړو وزارت د فوق لیسانس برنامو د لا پیاوړتیا په برخه کې همکار دی او د معیاري کېدو هڅو ته د قدر په سترګه ګوري.
د کابل پوهنتون رئیس دوکتور اسامه عزیز د فوق لیسانس برنامو آمریت له لوري د یادې غونډې جوړېدل ستر ابتکار یاد کړ او د دې برنامو په لا معیاري کېدو یې ټینکار وکړ. د نوموړي په وینا له دا شان پروګرامونه څخه موخه دا ده چې، د کابل پوهنتون او د هېواد نورو پوهنتونونو استادانو ترمنځ د علمي همکاریو په برخه کې همغږي رامنځته شي. ښاغلي دوکتور اسامه عزیز د هېواد پرمختګ ته په اشارې سره وویل، چې د لوړو مسلکي زده کړو معیار لوړولو سره هېواد ځان بسیاینې ته ژر رسېدلی شي او دا یې د ټولو ګډ مسوولیت یاد کړ.
