په کابل کې د ایران اسلامي جمهوریت سفیر له کابل پوهنتون څخه لیدنه وکړه
په کابل کې ایران اسلامي جمهوریت سفیر بهادر امینیان له کابل پوهنتون څخه لیدنه وکړه او ددغه پوهنتون له رییس دکتور اسامه عزیز سره یې وکتل او د کابل پوهنتون او ایراني پوهنتونونو ترمنځ یې د علمي او اکاډمیکو اړیکو د پیاوړتیا په ګډون یې د پام وړپرموضوعاتو خبرې وکړې.
پدې کتنه کې د ایران سفیر د کابل پوهنتون له رییس سره د لیدنې فرصت له ورکړې څخه مننه وکړه او په پوهنتون کې یې د درسونو د پیل هرکلی وکړ او دا یې یو مثبت او د ستاینې وړ ګام وباله. ښاغلي امینیان زیاته کړه، چې ایران تل له کابل پوهنتون سره ښې اړیکې درلودې او مونږ اماده یو، چې د دې اړیکو په پیاوړتیا کې مرسته وکړو او هیله لرو، چې د کابل او تهران ترمنځ علمي او اکاډمیک مسایلو تبادله زیاته شي.
د کابل پوهنتون رییس په کابل پوهنتون کې د ایران سفیرته د ښه راغلاست ترڅنګ یې د کابل پوهنتون لپاره یې د هغه د ښه نیت څخه مننه وکړه او زیاته یې کړه، افغانستان او ایران ډېر مشترکات لري او مونږ هیله لرو، چې دغه مشترکاتو د پیاوړتیا په موخه او همدارنګه د کابل پوهنتون او ایران پوهنتونونو ترمنځ د علمي او اکاډمیکو اړیکو د ښه والي په موخه د دواړو هیوادونو د اصولو او پالیسیو په بنا یو میکانیزم جوړ تر څو د هغه پر بنسټ کاروکړو.
ایران د هغو هیوادونو له ډلې څخه دی، چې افغانستان سره یې د تېرو کلونو په اوږدو کې په تحصیلي او اکاډمیکه برخه کې مرسته کړې ده.
