اداري تشبثاتو اومنجمنټ ډيپارټمنټ

پېژندنه

د تشبثاتو ادارې او منجمنټ ډیپارټمنټ د کابل پوهنتون د اقتصاد پوهنځي په چوکاټ کې د لسانس او ماسټرۍ په تحصیلي کچو کې د علمي او مسلکي خدمتونو له مخکښو ډیپارټمنټونو څخه شمېرل کېږي. دغه ډیپارټمنټ د پوهنځي له نورو ډیپارټمنټونو سره د خپل ځانګړي تحصیلي جوړښت له مخې توپیر لري؛ ځکه چې فعالیتونه یې نه یوازې د یوې دودیزې تحصیلي رشتې په بڼه بلکې تر ډېره د یوه منظم، جامع او بازارمحوره تحصیلي پروګرام پر بنسټ تنظیم شوي دي. یاد ډیپارټمنټ د بېلابېلو تخصصي برخو له غوره او مجربو علمي کادرونو څخه جوړ دی چې پکې د منجمنټ، کاروبار، مالي، بازار موندنې مالي او تشبثات شامل دي. دغه علمي ترکیب د دې لامل ګرځېدلی چې ډیپارټمنټ د کاري بازار له اړتیاوو سره سم، معیاري او تطبیقي زده‌کړې وړاندې کړي.

د تشبثاتو ادارې او منجمنټ ډیپارټمنټ په ۱۹۷۴ میلادي کال کې د اقتصاد پوهنځي تر چتر لاندې تأسیس شو او د هغه وخت د کار بازار اړتیاوو ته په کتو سره د (اقتصاد تصدي) په نوم یادېده. وروسته، په ۱۹۹۲ میلادي کال کې د هېواد د اقتصادي شرایطو او حالاتو له بدلون سره سم ددې ډیپارټمنټ نوم (منجمنټ او صنعت) ته واوښت. همدارنګه په ۱۹۸۷ میلادي کال کې د منجمنټ او صنعت ډیپارټمنټ د محاسبې له ډیپارټمنټ سره مدغم شو او نوی جوړ شوی تشکیلاتي واحد یو ځل بیا د (اقتصاد تصدي) په نوم ونومول شو. څو کاله وروسته د افغانستان د اقتصادي فضا د وسعت، بدلونونو او نوساناتو په پام کې نیولو سره، د اقتصاد تصدي ډیپارټمنټ د (منجمنټ او تشبثاتو ادارې) په نوم ونومول شو. د څانګې د وروستیو نومونو بدلون د نړیوالو اقتصادي بازارونو د رقابتي شرایطو او اړوندو اړتیاوو څرګندونه کوي. دا څانګه په ۲۰۱۵ میلادي کال کې د افغانستان د پوهنتونونو د ملاتړ او د بشري ځواک د پراختیا پروګرام په تخنیکي او مالي ملاتړ سره د تشبثاتو ادارې او منجمنټ ډیپارټمنټ نوم ته واوښت چې تر دې دمه پکې پیاوړي علمي کادرونه د هیواد تر ټولو ارزښتمنه پانګه یعنې بشري ځواک د معیاري پوهې، مسلکي مهارتونو، اړینو وړتیاوو او عملي تجربو په لرلو سره روزي او د اقتصادي پرمختګ د تحقق په موخه یې ټولنې ته وړاندې کوي.

لرلید
د اسلامي ارزښتونو پر بنسټ د کاروبار د ادارې په برخه کې د باکیفیته، تخصصي او ارزښت‌محوره زده کړو برابرول، تر څو یو ژمن، نوښتګر، متشبث او خدمت‌محوره نسل وروزل شي.

ماموریت
د اسلامي ارزښتونو پر بنسټ د باکیفیته زده کړو او کاروباري مهارتونو له لارې د محصلانو ځواکمن کول، تر څو د کاروبار اغېزناکه رهبري او مدیریت ترسره کړي؛ د ملاتړ کوونکي اکاډمیک چاپېریال رامنځته کول؛ د کار بازار له اړتیاوو سره د نصاب برابرول؛ د محصل‌محوره ښوونیزو میتودونو پلي کول؛ له امارتي او خصوصي بنسټونو سره د رغنده همکاریو پراختیا او د دوامدارو ښوونیزو مهارتونو او ادارو پیاوړتیا.

موخې

1. د اصولو، صداقت، امانت‌ دارۍ او ټولنې ته د خدمت پر بنسټ د کاروبار او تشبثاتو په برخه کې د نظري او عملي پوهې برابرول.

2. د حسنه اخلاقو او سالم تعامل سره په کاري چاپېریال کې د اغېزمنو او مسلکي اړیکو مهارتونو لوړول.

3. په ډله‌ییزو کارونو کې د محصلانو د لیاقت، عادلانه او مسوولیت منونکې رهبرۍ د مهارتونو لوړول.

4. د مسلکي اخلاقو او اسلامي ارزښتونو په رڼا کې د بازارموندنې، مالي چارو او بشري سرچینو مدیریت په برخو کې د نوښتګر او انتقادي تفکر له لارې د محصلانو ځواکمنول.

5. د بازارموندنې، مالي چارو او بشري سرچینو مدیریت په برخو کې د محصلانو د څېړنیزو وړتیاوو لوړول.

ارزښتونه

• د ديني، ملي ارزښتونو او اسلامي شعایرو ساتنه، درناوی او رعایت.

• د عقیدوي، فکري، اخلاقي، علمي او مسلکي روحیې هر اړخیزه پیاوړتیا.

• د اخلاص، تقوا او د عباداتو د ترسره کولو د روحیې پیاوړتیا.

• د متدینو، مسلکي او د اسلامي ارزښتونو ته ژمنو کادرونو روزنې ته پاملرنه.

• د اسلامي ورورګلوۍ، یووالي، ترحم، همدردۍ، خدمت‌، متقابل درناوي او ایثار د روحیې پیاوړتیا.

• په ژوند کې د شرعي احکامو د عملي کولو تر څنګ پر هغې د ټینګ باور پیاوړتیا.

• د اړیکو د ټینګښت او ديني علومو سره د توازن د رامنځته کولو د روحیې پیاوړتیا.

د لسانس دورې تحصیلي نصاب