د کابل پوهنتون د فارمسي پوهنځي، دعوت پوهنتون او د میهن لوړو زده کړو مؤسسې ترمنځ د همکارۍ د تفاهملیک لاسلیک
د کابل پوهنتون د فارمسي پوهنځي، دعوت خصوصي پوهنتون او د میهن لوړو زده کړو مؤسسې ترمنځ د هر اړخیزو همکاریو تفاهملیک د روان لمریز کال د کب پر څلورمه د چارشنبې پر ورځ د کابل پوهنتون د رییس ښاغلي ډاکټر اسامه عزیز په حضورکې لاسلیک شو.
د کابل پوهنتون رییس د تفاهملیک د تفاهم لیک د لاسلیک پر مهال د فارمسي پوهنځي دا نوښت وستایه او زیاته یې کړه چې تفاهم لیک ښه مواد لري خو زموږ په ښه نیت پورې تړاو لري چې په عملي کولو کې یې ژمن واوسو او له نمایشي چلنه ډډه وکړو. ښاغلي ډاکټر اسامه عزیز زیاته کړه د فارمسي پوهنځي وړتیاو ته په کتو نوموړی پوهنځي کولای شي له دې دوو بنسټونو سره په علمي، څېړنیز او تحصیلي برخو کې مرسته وکړي.
د کابل پوهنتون د فارمسي پوهنځي رییس پوهنوال اقامحمد ژکفر، د دعوت پوهنتون علمي مرستیال او سرپرست ډاکټر شېرعلي ظریفي او د میهن د لوړو زده کړو د مؤسسې علمي مرستیال پوهاند محمد حسن رشیق د تفاهم لیک په لاسلیکېدا خوښي وښوده او پر عملي کېدا یې ټینګار وکړ. دوی زیاته کړه چې د نوموړي تفاهملیک د موادو د ښه تطبیق په موخه دې د درې واړو لوریو له خوا یو کاري ګروپ رامنځته شي، چې مسایل سره له نژدې یو له بل سره شریک کړي.
