په کابل پوهنتون کې یو اونيز کتاب نندارتون جوړ شو
په کابل پوهنتون کې د کتاب د اوونۍ او د مطالعې د کلتور د ودې په موخه یو اونیزه د کتابونو نندارتون جوړ شو. د نندارتون د پرانیستلو په مراسمو کې د اطلاعاتو او کلتور وزیر ښاغلي مولوي خیرالله خیرخواه، د ا.ا.ا ویاند او د اطلاعاتو او کلتور وزارت مرستیال ښاغلي ذبیح الله مجاهد، د کابل پوهنتون رئیس دکتور اسامه عزیز، د پوهنتون استادانو او محصلینو هم ګډون کړی و.
د کابل پوهنتون رئیس دکتور اسامه عزیز د دغه نندارتون د تنظیموونکو، په ځانګړې توګه د اطلاعاتو او فرهنګ وزارت له کړنو څخه ستاینه وکړه او ویې ویل، چې په هېواد کې د پرمختګ او سوکالۍ په موخه باید د لوستلو فرهنګ وده وکړي، دا مسئله په ځانګړې توګه په اسلامي شریعت کې د اهمیت وړ ده، په قران کريم کې څو ځله د لوستلو او ليکلو اهميت ته اشاره شوې، همدارنګه اسلام دين موږ ته د کتابونو په وسيله را رسېدلی، بايد په خپل ژوند کې د لوستلو کلتور تل په پام کې ونيسو.
د کابل پوهنتون رئيس د خپلو خبرو په بله برخه کې د کتاب لوستلو ته د محصلينو د هڅونې تر څنګ وویل، چې د تحصیل په دوره کې د یو محصل لپاره مطالعه او څېړنه لکه د انسان په بدن کې د اکسیجن په څېر مهمه ده، که محصل له څېړنې او مطالعې نه لرې وي؛ نشي کولای خپلو موخو ته ورسیږي، او زه هیله من یم، چې محترم استادان به محصلین د مطالعې او کتاب لوستلو په روحیه وروزي او هر محصل د ځان لپاره یو کتابتون ولري، او دا نندارتون به د مطالعې او څېړنې لپاره د کابل پوهنتون د محصلینو د هڅونې او انګيزې د ايجاد ښه فرصت وي.
د اطلاعاتو او کلتور وزير مولوي خيرالله خيرخواه په دغه نندارتون کې دګډون له امله خوښي وښوده او محصلانو ته په خطاب کې يې وويل، چې د هېواد راتلونکی د ځوانانو دی او په راتلونکې کې د دولت لپاره زده کړه، تقوا او وړتیا مهمه ده، ځوانان باید تشویش ونه لري، نوی نظام د هغوی خدمت لپاره اماده او د ځوانانو په فکر کې دی، ټول به په ګډه د هیواد په ابادي کې برخه اخلو، اختلافات به یوې خوا ته کوو او خپلې لاسته راوړنې به پیاوړې کوو.
همدارنګه په دغه نندارتون کې د ا.ا.ا ویاند او د اطلاعاتو او کلتور وزارت مرستیال ښاغلي ذبیح الله مجاهد د کابل پوهنتون له مشرتابه څخه د دغه نندارتون په جوړیدو کې د همکارۍ له امله مننه وکړه او ویې ویل، چې پرمختګ د علم او پوهې محصول دی او موږ هغه مهال د علم او پوهې څښتنان کيږو، چې مطالعه او څېړنه ولرو، په دې توګه باید د مطالعې او څیړنې لپاره له هر ممکن فرصت څخه کار واخلو او همدا د هیواد له وروسته پاتې والي نه د خلاصون یوازینۍ لار ده.
ښاغلي مجاهد له خپرندویه ټولنو وغوښتل، چې په دغه نندارتون کې د زده کوونکو په واک کې په مناسبه بیه ښه، ګټور او اغېزناک کتابونه ورکړي، ترڅو د مطالعې د کلتور په لوري د هغوی د هڅونې او انګېزې سبب شي او دا ډول نندارتونونه باید په ولایتونو کې هم جوړ شي.
د یادونې وړ ده، دغه نندارتون یوه اونۍ دوام کوي او ۳۵ خپرندویه ټولنو په کې ګډون کړی دی. په دغه نندارتون کې ۱۵۰۰ عنوانه کتابونه، چې څه د پاسه سل زره ټوکه کتابونه کيږي، نندارې ته وړاندې شوي دي او متقاضیان کولای شي، چې هره ورځ ورڅخه لیدنه وکړي.
