له ټولګي تر مارکېټه؛ د محصلینو د نوښتونو نندارتون؛
د زراعت، اوبو لګولو او مالدارۍ وزارت له لوري په کابل کې درې ورځنی ملي نندارتون پیل شو، په دې نندارتون کې د کابل پوهنتون د زراعت پوهنځي محصلینو خپل ۴۵ قلمه تولیدات نندارې ته وړاندې کړل، چې موخه یې د څېړنو، نوښتونو او ټکنالوژۍ څخه د محصلینو اعظمي استفاده وه، دغه تولیدات چې په دوه جلا غرفو کې ځای پر ځای شوي وو، درې مهمې برخې یې رانغاړلې: غذایي توکي، حیواني غذا او کرنیز محصولات. یاد تولیدات د زراعت پوهنځي د محصلینو او استادانو د عملي تجربو پایله وه، چې د دې پوهنځي د لوړ ظرفیت ښکارندويي کوي.
