د کابل پوهنتون وترنري علومو پوهنځي محصلینو د وحشي ژوو ژوند په اړه ۱۰ورځنی ورکشاپ تر سره کړ
نوموړی ورکشاپ د کابل ژوبڼ ریاست لخوا د مرغومې په ۲۰مه نېټه د وحشي ژوو ژوند تر عنوان لاندې د وترنري پوهنځي پنځم ټولګي محصلینو ته ترسره شو او ۳۰ تنه محصلینو د ژمنۍ رخصتۍ څخه په ګټه اخیستنې وکولای شول، چې د نوموړي ورکشاپ ګټورو موضوعاتو څخه ګټه پورته کړي.
په نوموړي ورکشاپ کې: د ژوبڼ ریاست وظایف او ترسره کړې کړنې، د ژوبڼ اهمیت، د حیواناتو د تغذیې څرنګوالی، له ژوو څخه ساتنه او د نسل اخیستلو څرنګوالی، د څارویو ثبتول، د وحشي ژوو د درملنې څرنګوالی، ایکولوژي، د وترنري علومو اخلاق او قواعد، له وحشي ژوو څخه د ساري ناروغیو د مخنیوي څرنګوالی، د کم پیدا ژوو له ډولونو څخه ساتنه، په هېواد کې د وحشي ژوو اوسنی وضعیت، د وترنري آمریت لاسته راوړنې او نورو موضوعات شامل وو.
په دې ورکشاپ کې د کابل ژوبڼ رئیس ښاغلي عزیز ګل ثاقب، د وترنري پوهنځي رئیس ښاغلي داکتر شیرعلي جوهر صافي، د نوموړي پوهنځي استادانو، د خوست پوهنتون استازي، د میهو موسسې استازي، د ویت سرف شرکت استازي خپل ګټورې او مسلکي تجربې له محصلینو سره شریکې کړې او په پای کې پر محصلینو سرټیفیکټونه هم وویشل شول.
