په کابل پوهنتون کې د مرکز زون د پوهنتونونو د کادري بستونو د نوماندانو بهرنۍ ژبې ازموینه واخیستل شوه
د مرکز زون د پوهنتونونو د علمي کادر نوماندانو بهرنۍ ژبې ازموینه د لوړو زده کړو وزارت د علمي مرستیال ښاغلي لطف الله خیرخواه، د کابل پوهنتون رییس ښاغلي دکتور اسامه عزیز ، د پوهنتون علمي مرستیال پوهاند محمد شفیع شریفي او له دې بهیر څخه د څارنې کمېټې غړو په ګډون د کابل پوهنتون د ژبو او ادبیاتو پوهنځي په انګلیسي څانګې کې واخیستل شو.
د لوړو زده کړو علمي مرستیال او د کابل پوهنتون د ازموینې اخیستو له بهیر څخه د څارنې په لړ کې پدې بهیر کې یې د روڼتیا او امانتداري، نظم او ډيسپلین د تامین غوښتونکي شول او یادونه یې وکړه، چې په پوهنتونونو کې د علمي کادر د جذب معیار خپله د نوماند وړتیا او توانايي ده.
د مرکز زون د پوهنتونونو د کادري بستونو د بهرنۍ ژبې په ازموینه کې تر ۶۰۰ تنو هلکانو او نجونو ګډون کړی وو او په پام کې ده، چې د دې ازموینې د پایلې تر اعلان وروسته د دې بستونو تخصصي ازموینه هم اخیستل کیږي.
