د کابل پوهنتون د حیواني محصولاتو د تولید په برخه کې د ځان بساینې د پلان جوړولو ورکشاپ دائر شو
ددغه دوه ورځني ورکشاپ موخه چې د وترنري علومو پوهنځي او د پوهنتون د علمي څېړنو د آمریت په همکاری جوړ وو د هېواد د حیواني محصولاتو په تولید کې پر ځان بسیا کول دي، چې د کرنې او مالیې وزارتونو، عامې روغتیا، تجارت، د کلیو پراختیا، چاپېریال، احصایې او معلوماتو، ملګرو ملتونو د خوړو او کرنې سازمان، اقتصاد او ملي ادارې استازو په کې ګډون کړی وو د روان کال د تلې میاشتې په ۱۸ مه نېټه د دوشنبه په ورځ دائر شو.
د دغه ورکشاپ د مراسمو په پیل کې د پوهنتون د عملي چارو مرستیال ښاغلي پوهاند محمد شفیع شریفي” د حیواناتو د خوراکي توکو د تولید او د بې وزلۍ په کمولو کې د افغانستان د ځان بساینې رول“ په اړه خبرې وکړې او د مېلمنو له راتګ او د یاد ورکشاپ له جوړونکو یې مننه او قدردانی وکړ.
پوهاند شریفي وویل: هر کال په ملیونونو ډالر د څارویو د خوراکي توکو د پېرلو په خاطر بهر ته ځي، موږ باید د هېواد د ننه د دغو محصولاتو د تولید لپاره یو پلان جوړ کړو څو له یوې خوا د پانګې د وتلو مخه ونیول شي او له بلې خوا په هېواد کې عایدات زیات او د کار زمینه براره وي.
ورپسې د علمي څېړنو آمر ښاغلي پوهنمل محمدولي سالاري د سکتوري اداراتو لپاره د څېړنیزو خدمتونو د وړاندې کولو په برخه کې ددغه مرکز د فعالیتونو او ظرفیتونو په اړه خبرې وکړې او ټینګار یې وکړ چې دا مرکز د ټولو په خدمت کې دی او ټولو بهرني او کورني بنسټونو ته په علمي او څېړنیزو مسایلو کې همکاری ته چمتو دی.
دغه راز د وترنري علومو پوهنځي استاد پوهنوال اسد الله صمدي د مالدارۍ او حیواني تولیداتو د اوسني وضعیت په اړه خپل پرېزنټېشن وړاندې کړ او پدې برخه کې یې د داخلي پانګونې غوښتنه وکړه.
د اجنډا له مخې، د ورکشاپ د ګډون کوونکو څانګو استازو هر یو په ټاکل شویو موضوعاتو خبرې وکړې او د کابل پوهنتون ددغه پلان د هرکلي ترڅنګ یې د همکارۍ لپاره خپل چمتووالی څرګند کړ.
د ورکشاپ په پای کې ګډونوال په فرعي ګروپونو ووېشل شول تر څو د څارویو د خوراکي محصولاتو په برخه کې د افغانستان د خود کفایۍ ( ځان بساینې ) په اړه خبرې وکړې او له ډېرو بحثونو وروسته یې ددغه پلان د غني کېدو په اړه خپل نظریات وړاندې کړل.
