د لوړو زده کړو وزیر سره د کابل پوهنتون د رهبري شورا او علمي کادر غړو ناسته
د روان کال د تلې په ۷ نېټه د چهارشنبې په ورځ د کابل پوهنتون د رهبري هئیت ناسه د لوړو زده کړو وزارت د ناستو په تالار کې د لوړو زده کړو وزیر ښاغلي شیخ عبدالباقي حقاني، د لوړو زده کړو وزارت علمي مرستیال ښاغلي روح الله روحاني، د لوړو زده کړو وزارت د خپرونو، اطلاعاتو او اړیکو رییس ښاغلي دکتور دلاور سیلاب، د هیواد وتلي عالم ښاغلي شیخ الحدیث مولوي شاه محمد او د کابل پوهنتون د علمي شورا د غړو په ګډون جوړه شوه.
دا ناسته د کابل پوهنتون د ارواپوهنې او روزنیزو علومو رييس ښاغلي پوهنوال ستارالدین صدیقي له لوري د قران کریم د څو مبارکو ایاتونو په تلاوت سره پیل شوه. وروسته د لوړو زده کړو وزارت علمي مرستیال ښآغلي روح الله روحاني د کابل پوهنتون استادانو او رهبري شورا غړو ته د ښه راغلاست ترڅنګ یې د ناستې په بنسټیزو محورونو خبرې وکړې او د ناستې له غړو سره یې خپل نظریات شریک کړل.
د ناستې په دوام د لوړو زده کړو وزیر ښاغلي شیخ عبدالباقي حقاني د کابل پوهنتون د مقام او همدارنګه یې د هیواد په کچه د دې پوهنتون د رول او اغېزمنتیا په هکله خبرې وکړې او د کابل پوهنتون له استادانو او علمي کادر له غړو څخه یې هیله وکړه تر څو په مختلفو برخو کې خپلې علمي، عملي طرحې او نورې برنامې شریکې کړي.
همدارنګه د کابل پوهنتون ریاست سرپرست ښاغلي محمد اشرف غیرت هم د کابل پوهنتون له لوري د لوړو زده کړو وزارت رهبري هئیت ته ډاډ ورکړ، چې د دې پوهنتون رهبري هئیت او د علمي کادر غړي په یادو برخو کې د لوړو زده کړو وزارت سره همکاري کوي.
په پای کې د کابل پوهنتون دوه تنو استادانو هم پدې ناسته کې خبرې وکړې او د طرحو او برنامو د جوړېډو په برخه کې یې د لوړو زده کړو وزارت سره د هر ډول همکاریو وعده وکړه.
غونډه هیواد ته د خیر او ښېګڼې د دعا په کولو سره پای ته ورسېده.
