د کابل پوهنتون د کیمیا پوهنځي نوی رییس معرفي شو
پوهندوی مسعود منصوري د کابل پوهنتون د رییس له لوري د دې پوهنتون د محصلینو چارو مرستیال او د کیمیا پوهنځي استادانو په شتون کې د روان کال د وري په ۸ نېټه د شنبې په ورځ د کابل پوهنتون د کیمیا پوهنځي د رییس په توګه د دې پوهنځي استادانو او کارمندانو ته ورپېژندل شو.
د کابل پوهنتون رییس پوهاند دکتور محمد عثمان بابري د پوهندوی منصوري د پېژندنې پر مهال یې نوموړي ته د بریالیتوب غوښتنه وکړه او ویې ویل، چې د کیمیا پوهنځی د کابل پوهنتون له مهمو پوهنځیو له ډلې څخه شمېرل کیږي، پدې پوهنځي کې ښه کارونه تر سره شوي دي او اړینه ده، چې نور زیات کارونه هم تر سره شي. پوهاند بابري هیله وښوده، چې منصوري د توانایيو په درلودو سره د کیمیا پوهنځي کې زیات مثبت بدلونونه راولي.
وروسته د کیمیا پوهنځي نوي رییس پوهندوی مسعود منصوري د کابل پوهنتون، لوړو زده زده کړو وزارت له رهبري او د دې پوهنځي د استادانو له باور څخه مننه وکړه او ویې ویل، چې د کابل پوهنتون د رهبري د لارښوونو په رڼا او د استادانو سره په همکاري د دې پوهنځي د وضعیت په کمي او کیفي وضعیت د غوره والي لپاره په خپل ټول توان او هڅو سره کار کوي. همدارنګه د کیمیا پوهنځي رییس وویل، چې په سمه توګه د کارونو تر سره کولو لپاره د کابل پوهنتون رهبري او د کیمیا پوهنځي مسوولینو هر اړخیزو همکاریو ته اړتیا لري. د غونډې په پای کې د کیمیا پوهنځي استادانو او مسوولینو د دې پوهنځي نوي رییس ته د مبارکي ترڅنګ د هر ډول همکاریو وعده وکړه.
