د وترنری علومو پوهنځي له څلویښتو زیاتو محصلینو د وحشي ژوند په ورکشاپ کی زده کړه تر سره کړه
د کابل پوهنتون د وترنري علومو پوهنځي د پنځم ټولګي له ۴۰ تنو زیاتو محصیلینو د وحشي ژوند په ورکشاپ کې چې له ۱۵ ورځو په جریان د کابل ژوبڼ د رهبرۍ له خوا جوړ شوی و، زده کړه وکړه. دغه محصلین د پوهنځي د رهبرۍ په هڅو د هغوی د عملي مهارتونو د لوړولو په موخه دغه ورکشاپ ته ور وپېژندل شول.
په دې ورکشاپ کې محصلینو د دوه اونیو په لړ کې د وحشي ژوند د بېلابېلو موضوعاتو په اړه زده کړې وکړي، چې له جملې یې د کابل ژوبڼ تاریخچه او پېژندنه ، د وحشي او کورنیو حیواناتو خوراک، له قفسونو د محصلینو علمي لیدنه، دوحشي حیواناتو ضبط او ربط، په نظري او عملي ډول دوسایلو کارونه ، ایکولوژي، د ژوند تنوع، په افغانستان کې د وحشي ژوو وضعیت، د وحشي ژوو د ژوند ارزښتونه، په وحشي ژوو او طبیعت کې د ناروغیو مدیریت، د وحشي ژوو د ساتنې طریقې او د افغانستان د خوندي څارویو او نباتاتو پیژندنه، د کابل ژوبڼ ریاست له خوا د څیړنیزو پروژو ترسره کول شامل دي.
د وترنري علومو پوهنځي رئيس ډاکټر شېرعلي جوهر وايي؛ د کابل پوهنتون او ژوبڼ ترمنځ د همکارۍ د هوکړې پر بنسټ به د محصلينو د ظرفيت د لوړولو په موخه دا ډول عملي کارونه دوام ولري او د وترنری علومو پوهنځي د محصلینو لپاره به په هر سمستر کې لږ تر لږه دوه پروګرامونه کابل ژوبڼ لخوا تنظیمیږي.
د دغه ورکشاپ په پای کې د وترنری علومو پوهنځي د رئیس او استادانو په حضور کې د کابل ژوبڼ د رهبرۍ له خوا په فارغو محصلینو ستاینلیکونه وویشل شول.
